歡迎收聽，廣東話新聞慢慢聽。[Mandarin] [English]
由Tsubasa 阿翼報導新聞。
fun1 jing4 sau1 teng1, gwong2 dung1 waa2 san1 man4 maan6 maan2 teng1. [Mandarin] [English]
jau4 Tsubasa aa3 jik6 bou3 dou6 san1 man4.
而家係香港時間2022年9 月22號下晝2點。
首先係香港新聞。
財政司司長陳茂波話，政府喺今個財政年度嘅赤字會超過港幣一千億，財政儲備會跌到落八千億。情況會比預期差，主要係同抗疫開支多咗有關。另外，樓市同埋股市交易減少，都會影響到政府嘅收入。但係，佢認為大家唔使過分擔心。
金管局總裁余偉文話，美國聯儲局最近加息四分三厘，同之前預計嘅差唔多。但係，佢叫市民，尤其係打算買樓嘅人，要對銀行加息做好準備。
警察拉咗三個醫生，佢哋同濫發「免針紙」，即係「新冠疫苗接種醫學豁免證明書」有關。有醫生同醫療團體一齊發出聲明鬧佢哋，同埋呼籲市民儘快打疫苗。
ji4 gaa1 hai6 hoeng1 gong2 si4 gaan3 2022 nin4 9 jyut6 22 hou6 haa6 zau3 2 dim2.
sau2 sin1 hai6 hoeng1 gong2 san1 man4.
coi4 zing3 si1 si1 zoeng2 can4 mau6 bo1 waa6, zing3 fu2 hai2 gam1 go3 coi4 zing3 nin4 dou6 ge3 cek3 zi6 wui5 ciu1 gwo3 gong2 bai6 jat1 cin1 jik1, coi4 zing3 cyu5 bei6 wui5 dit3 dou2 lok6 baat3 cin1 jik1. cing4 fong3 wui5 bei2 jyu6 kei4 caa1, zyu2 jiu3 hai6 tung4 kong3 jik6 hoi1 zi1 do1 zo2 jau5 gwaan1. ling6 ngoi6, lau4 si5 tung4 maai4 gu2 si5 gaau1 jik6 gaam2 siu2, dou1 wui5 jing2 hoeng2 dou3 zing3 fu2 ge3 sau1 jap6. daan6 hai6, keoi5 jing6 wai4 daai6 gaa1 m4 sai2 gwo3 fan6 daam1 sam1.
gam1 gun2 guk2 zung2 coi4 jyu4 wai5 man4 waa6, mei5 gwok3 lyun4 cyu5 guk6 zeoi3 gan6 gaa1 sik1 sei3 fan1 saam1 lei4, tung4 zi1 cin4 jyu6 gai3 ge3 caa1 m4 do1. daan6 hai6, keoi5 giu3 si5 man4, jau4 kei4 hai6 daa2 syun3 maai5 lau2 ge3 jan4, jiu3 deoi3 ngan4 hong4 gaa1 sik1 zou6 hou2 zeon2 bei6.
ging2 caat3 laai1 zo2 saam1 go3 ji1 sang1, keoi5 dei6 tung4 laam5 faat3「 min5 zam1 zi2」, zik1 hai6「 san1 gun1 jik6 miu4 zip3 zung2 ji1 hok6 kut3 min5 zing3 ming4 syu1」 jau5 gwaan1. jau5 ji1 sang1 tung4 ji1 liu4 tyun4 tai2 jat1 cai4 faat3 ceot1 seng1 ming4 naau6 keoi5 dei6, tung4 maai4 fu1 jyu6 si5 man4 zeon6 faai3 daa2 jik6 miu4.
如果你鍾意我嘅podcast，不如你follow我吖！你仲可以請我飲咖啡，或者加入我嘅Patreon㗎。多謝你對我嘅支持！
jyu4 gwo2 nei5 zung1 ji3 ngo5 ge3 podcast, bat1 jyu4 nei5 follow ngo5 aa1! nei5 zung6 ho2 ji5 ceng2 ngo5 jam2 gaa3 fe1, waak6 ze2 gaa1 jap6 ngo5 ge3 Patreon gaa3. do1 ze6 nei5 deoi3 ngo5 ge3 zi1 ci4!
其他地區新聞。
台灣由下個月13號開始，放寬檢疫規定做0+7，即係唔使再接受家居隔離，入境人次放寬至一個星期15萬。另外，佢哋會慢慢咁放寬戴口罩嘅規定。
俄羅斯總統普京簽署局部動員令，徵召30萬人上戰場，係第二次世界大戰以嚟嘅第一次。全國好多城市都有示威。有好多人因為擔心留喺俄羅斯需要當兵，所以搭飛機走去其他國家。
kei4 taa1 dei6 keoi1 san1 man4.
toi4 waan1 jau4 haa6 go3 jyut6 13 hou6 hoi1 ci2, fong3 fun1 gim2 jik6 kwai1 ding6 zou6 0+7, zik1 hai6 m4 sai2 zoi3 zip3 sau6 gaa1 geoi1 gaak3 lei4, jap6 ging2 jan4 ci3 fong3 fun1 zi3 jat1 go3 sing1 kei4 15 maan6. ling6 ngoi6, keoi5 dei6 wui5 maan6 maan2 gam2 fong3 fun1 daai3 hau2 zaau3 ge3 kwai1 ding6.
ngo4 lo4 si1 zung2 tung2 pou2 ging1 cim1 cyu5 guk6 bou6 dung6 jyun4 ling6, zing1 ziu6 30 maan6 jan4 soeng5 zin3 coeng4, hai6 dai6 ji6 ci3 sai3 gaai3 daai6 zin3 ji5 lai4 ge3 dai6 jat1 ci3. cyun4 gwok3 hou2 do1 sing4 si5 dou1 jau5 si6 wai1. jau5 hou2 do1 jan4 jan1 wai6 daam1 sam1 lau4 hai2 ngo4 lo4 si1 seoi1 jiu3 dong1 bing1, so2 ji5 daap3 fei1 gei1 zau2 heoi3 kei4 taa1 gwok3 gaa1.
如果你想睇返今日podcast內容嘅transcript，可以去我個網站，3個w . tsubasa cantonese . com下載。
今日嘅新聞係由香港電台、商業電台、南華早報同埋自由時報提供。
多謝收聽。
jyu4 gwo2 nei5 soeng2 tai2 faan1 gam1 jat6 podcast noi6 jung4 ge3 transcript, ho2 ji5 heoi3 ngo5 go3 mong5 zaam6,3 go3 w . tsubasa cantonese . com haa6 zoi3.
gam1 jat6 ge3 san1 man4 hai6 jau4 hoeng1 gong2 din6 toi4, soeng1 jip6 din6 toi4, naam4 waa4 zou2 bou3 tung4 maai4 zi6 jau4 si4 bou3 tai4 gung1.
do1 ze6 sau1 teng1.