歡迎收聽，廣東話新聞慢慢聽。[Mandarin] [English]
由Tsubasa 阿翼報導新聞。
fun1 jing4 sau1 teng1, gwong2 dung1 waa2 san1 man4 maan6 maan2 teng1. [Mandarin] [English]
jau4 Tsubasa aa3 jik6 bou3 dou6 san1 man4.
而家係香港時間2023年7月29號下晝5點。
香港新聞。
根據《華盛頓郵報》嘅報導，美國政府唔會俾行政長官李家超，出席11月喺三藩市舉行嘅APEC（亞太經濟合作組織）領導人會議，但係特區政府仍然可以派其他人參與呢個會議。李家超話，主辦方有責任按APEC嘅規矩邀請成員嘅領導人參與會議。中國外交部就要求美國解除而家對李家超嘅制裁，同埋要按慣例邀請佢參與APEC。
高等法院拒絕頒令禁同2019年抗爭運動有關嘅歌曲《願榮光歸香港》，行政長官李家超話，律政司會跟進呢件案件，認為如果呢首歌俾人以為係香港國歌，會傷害到民族感情，特區政府有責任唔俾呢啲事發生。呢首歌多次喺一啲國際運動比賽裡面播錯咗做國歌，已經令到香港政府非常不滿。
ji4 gaa1 hai6 hoeng1 gong2 si4 gaan3 2023 nin4 7 jyut6 29 hou6 haa6 zau3 5 dim2.
hoeng1 gong2 san1 man4.
gan1 geoi3《 waa4 sing6 deon6 jau4 bou3》 ge3 bou3 dou6, mei5 gwok3 zing3 fu2 m4 wui5 bei2 hang4 zing3 zoeng2 gun1 lei5 gaa1 ciu1, ceot1 zik6 11 jyut6 hai2 saam1 faan4 si5 geoi2 hang4 ge3 APEC( aa3 taai3 ging1 zai3 hap6 zok3 zou2 zik1) ling5 dou6 jan4 wui6 ji5, daan6 hai6 dak6 keoi1 zing3 fu2 jing4 jin4 ho2 ji5 paai3 kei4 taa1 jan4 caam1 jyu5 ni1 go3 wui6 ji5. lei5 gaa1 ciu1 waa6, zyu2 baan6 fong1 jau5 zaak3 jam6 on3 APEC ge3 kwai1 geoi2 jiu1 cing2 sing4 jyun4 ge3 ling5 dou6 jan4 caam1 jyu5 wui6 ji5. zung1 gwok3 ngoi6 gaau1 bou6 zau6 jiu1 kau4 mei5 gwok3 gaai2 ceoi4 ji4 gaa1 deoi3 lei5 gaa1 ciu1 ge3 zai3 coi4, tung4 maai4 jiu3 on3 gwaan3 lai6 jiu1 cing2 keoi5 caam1 jyu5 APEC.
gou1 dang2 faat3 jyun2 keoi5 zyut6 baan1 ling6 gam3 tung4 2019 nin4 kong3 zang1 wan6 dung6 jau5 gwaan1 ge3 go1 kuk1《 jyun6 wing4 gwong1 gwai1 hoeng1 gong2》, hang4 zing3 zoeng2 gun1 lei5 gaa1 ciu1 waa6, leot6 zing3 si1 wui5 gan1 zeon3 ni1 gin6 on3 gin6, jing6 wai4 jyu4 gwo2 ni1 sau2 go1 bei2 jan4 ji5 wai6 hai6 hoeng1 gong2 gwok3 go1, wui5 soeng1 hoi6 dou2 man4 zuk6 gam2 cing4, dak6 keoi1 zing3 fu2 jau5 zaak3 jam6 m4 bei2 ni1 di1 si6 faat3 sang1. ni1 sau2 go1 do1 ci3 hai2 jat1 di1 gwok3 zai3 wan6 dung6 bei2 coi3 leoi5 min6 bo3 co3 zo2 zou6 gwok3 go1, ji5 ging1 ling6 dou3 hoeng1 gong2 zing3 fu2 fei1 soeng4 bat1 mun5.
鍾意我哋嘅節目？記得share同subscribe呀！
zung1 ji3 ngo5 dei6 ge3 zit3 muk6? gei3 dak1 share tung4 subscribe aa3!
尋日喺港鐵火炭站，有一隻野豬走咗出嚟，咬傷咗兩個搭緊扶手電梯嘅乘客。漁護署話，佢哋非常關注呢件事，話隻豬已經俾佢哋捉咗，再人道毀滅，希望兩位傷者可以早日康復。
cam4 jat6 hai2 gong2 tit3 fo2 taan3 zaam6, jau5 jat1 zek3 je5 zyu1 zau2 zo2 ceot1 lai4, ngaau5 soeng1 zo2 loeng5 go3 daap3 gan2 fu4 sau2 din6 tai1 ge3 sing4 haak3. jyu4 wu6 cyu5 waa6, keoi5 dei6 fei1 soeng4 gwaan1 zyu3 ni1 gin6 si6, waa6 zek3 zyu1 ji5 ging1 bei2 keoi5 dei6 zuk1 zo2, zoi3 jan4 dou6 wai2 mit6, hei1 mong6 loeng5 wai2 soeng1 ze2 ho2 ji5 zou2 jat6 hong1 fuk6.
如果你想睇返今日podcast內容嘅transcript，可以去我個網站，3個w . tsubasa cantonese . com下載。
今日嘅新聞係由香港電台、商業電台、南華早報同埋自由時報提供。
多謝收聽。
jyu4 gwo2 nei5 soeng2 tai2 faan1 gam1 jat6 podcast noi6 jung4 ge3 transcript, ho2 ji5 heoi3 ngo5 go3 mong5 zaam6,3 go3 w . tsubasa cantonese . com haa6 zoi3.
gam1 jat6 ge3 san1 man4 hai6 jau4 hoeng1 gong2 din6 toi4, soeng1 jip6 din6 toi4, naam4 waa4 zou2 bou3 tung4 maai4 zi6 jau4 si4 bou3 tai4 gung1.
do1 ze6 sau1 teng1.